TEKNIKARIRIK GABE, KULTURARIK EZ!
Itzalpeko lana da teknikari eta backliner-ena; ikuskizunak osotasunean goza ditzagun behar-beharrezkoa. Irudian ageri dira musikari eta argazkilari bezala ezagutu ditudan batzuk, profesional izugarriak denak. Askoz gehiago daude noski eta geure babes osoa behar dute. Izan ere, hauek gabe ez da kontzerturik, diskorik, antzezlanik, pelikularik... kulturarik.
Martxoan, apirilean eta maiatzean nituen kontzertu eta promo-sesioak zenbatu ditut, 18 ziren hilabete hauetan. Ekainetik aurrera nituenak nahiago begiratu ere ez. Asko proiektu berrien aurkezpenak ziren, emanaldi bereziak zinez.
Kulturan dihardugun gehienontzat jarduera guztiz eten da, egun batetik bestera. Badakigu gainera kultura zer den arduradun politiko gehienentzat, hutsaren hurrengoa... eta egoera hau luzerako doala ematen du. Zenbat familia utziko dituzte itotzen bien bitartean? Laguntza serioa behar da sektore askotan, eta kulturgintzan bereziki. Ez soilik sortzaileentzako, baita inguruan aritzen diren langile guztientzako ere.
Nik badakit ez dudala jasoko inolako laguntzarik eta irakaskuntza dudanez ogibide nagusi, gaitz erdi. Konformatuko nintzateke ordea honetaz bizi direnek edo egoera ekonomiko larrian daudenek jasoko balituzkete. Proiektu asko geratu dira ‘stand by’ egoeran, beste asko ezingo dira berreskuratu eta badakigu sakrifizio handiak egin beharko ditugula bidean. Baina gizarte batek ezin du bere kultura hiltzen utzi, hori baita desberdin egiten gaituena. Balio dezala egoerak kulturgintzari merezi duen lekua emateko eta behar bezala babesteko.
Bihar eta etzi GREBA DIGITALA egingo dugu; kantarik ez, argazkirik ez, olerkirik ez, bideorik ez... ikus gaitzazuen desagertuko gara, entzun gaitzazuen isilduko gara.
#kulturgintzan
AIKOR! aldizkariak @berritxarrak taldearen agurreko irudiak eta testutxo bat eskatu zizkidan. Gaur argitaratu da, justu hilabete betetzen denean. Aldizkarian akats bat dagoela uste dut, baina ez da nirea, berridazketan pasatuko zitzaien. Hauxe testua:
Berri Txarrakek duela urtebete iragarri zuen etenaldi mugagabea, eta konturatu orduko agertokia hutsik geratu da. Izan ere, taldea azaroaren 23an agurtu genuen merezi bezala: salto, negar, irribarre, oihu eta txalo artean.
Urte honetan BTXen 20 emanaldi gorde ditut irudietan: Gernika, Durango, Bartzelona, Donostia, Bilbo, Madrid, Gasteiz, Biarritz, Iruñea... Abentura izugarria izan da eta pribilegiatua sentitu naiz. BTX Euskal Herriak eman duen talderik handiena delako, inork pentsatuko ez lituzkeen sabaiak eta hormak hautsi dituena. Lekunberritik mundura, bihotzetik bihotzera... Lehen egunetik azken egunera pasioz eta euskaraz. Gorka Urbizu musikari eta poeta apartaren gidaritzapean, esparru artistikoa gainditu eta sentimendu bilakatu da Berri. Hori bizirik mantentzea da orain gure ardura, haria ez dadila eten.
Eskerrik asko bihotzez Gorkari, Galderri, Davidi, Aitor Goikoetxeari, Mikel 'Rubio'ri, Aitor Orejari eta BTX Crew guztiari.
Hutsik gelditu da eszenatokia, abiatu da hirukotea. Ez dakigu noiz itzuliko diren, agian, inoiz. Bien bitartean, proiektu berriak helduko dira... eta ez da berdina izanen. Baina, ez ote da hori zirraragarria?
Argazki eta bideo guztiak bidali eta argitaratu ondoren, neri ere iritsi zait BTX abentura amaitutzat emateko unea.
Farewell, @berritxarrak
